Sikh Raj Kiven Baneya || ਸਿੱਖ ਰਾਜ ਕਿਵੇਂ ਬਣਿਆ || ਸੋਹਣ ਸਿੰਘ ਸੀਤਲ

ਸਭ ਤੋਂ ਪਹਿਲੀ ਇਤਿਹਾਸਕ ਪੁਸਤਕ ਮੈਂ 'ਸਿੱਖ ਰਾਜ ਕਿਵੇਂ ਗਿਆ?' ਲਿਖੀ ਸੀ। ਉਸ ਦੇ ਪਰਕਾਸ਼ਤ ਹੋਣ ਉੱਤੇ ਪਾਠਕਾਂ ਨੇ ਮੇਰਾ ਏਨਾ ਹੌਸਲਾ ਵਧਾਇਆ, ਕਿ ਮੇਰੇ ਅੰਦਰ ਇਤਿਹਾਸ ਲਿਖਣ ਦੀ ਲਗਨ ਪੈਦਾ ਹੋ ਗਈ। ਜਿਹੜੀ ਪੁਸਤਕ ਇਸ ਵੇਲੇ ਆਪ ਜੀ ਦੇ ਹੱਥ ਵਿਚ ਹੈ, ਇਹ ਮੈਂ ਪਾਕਿਸਤਾਨ ਬਣਨ ਤੋਂ ਪਹਿਲਾਂ ਲਿਖਣੀ ਆਰੰਭ ਕੀਤੀ ਸੀ। ਇਸ ਦਾ ਪਹਿਲਾ ਕਾਂਡ ਹੀ ਅਜੇ ਲਿਖਿਆ ਸੀ, ਜਾਂ 'ਆਜ਼ਾਦੀ' ਆ ਗਈ। ਲੱਖਾਂ ਹਿੰਦੂ ਸਿੱਖਾਂ ਨਾਲ ਮੈਨੂੰ ਵੀ ਪਾਕਿਸਤਾਨ ਵਿਚੋਂ ਘਰ ਘਾਟ ਛੱਡ ਕੇ ਆਉਣਾ ਪਿਆ। ਏਸ ਅਦਲਾ-ਬਦਲੀ ਵਿਚ ਬਹੁਤ ਸਾਰਾ ਕੱਠਾ ਕੀਤਾ ਹੋਇਆ ਇਤਿਹਾਸਕ ਮਸਾਲਾ ਪਾਕਿਸਤਾਨ ਵਿਚ ਹੀ ਰਹਿ ਗਿਆ। ਏਸ ਕਾਰਨ ਮੈਂ ਆਪਣੇ ਪਾਠਕਾਂ ਤੱਕ ਇਹ ਪੁਸਤਕ ਛੇਤੀ ਨਹੀਂ ਪੁਚਾ ਸਕਿਆ। ਫਿਰ ਨਵੇਂ ਸਿਰਿਓਂ ਲੋੜੀਂਦੀਆਂ ਚੀਜ਼ਾਂ ਕੱਠੀਆਂ ਕਰ ਕੇ ਇਹ ਲਿਖਤ ਅੱਜ ਇਤਿਹਾਸ ਦੇ ਪ੍ਰੇਮੀ ਪਾਠਕਾਂ ਦੀ ਭੇਟਾ ਕਰ ਰਿਹਾ ਹਾਂ ।

ਜਿਨ੍ਹਾਂ ਵਿੱਦਵਾਨ ਲਿਖਾਰੀਆਂ ਦੀਆਂ ਲਿਖਤਾਂ ਦੀ ਸਹਾਇਤਾ ਨਾਲ ਇਹ ਪੁਸਤਕ ਲਿਖੀ ਗਈ ਹੈ, ਮੈਂ ਉਹਨਾਂ ਦਾ ਦਿਲੋਂ ਧੰਨਵਾਦੀ ਹਾਂ। ਨਾਲ ਹੀ ਆਪਣੇ ਪਾਠਕਾਂ ਦਾ ਧੰਨਵਾਦ ਕਰਦਾ ਹਾਂ, ਜਿਨ੍ਹਾਂ ਦੀ ਕਿਰਪਾਲਤਾ ਨਾਲ ਮੈਂ ਇਹ ਰਚਨਾਵਾਂ ਛਾਪਣ ਯੋਗ ਹੋ ਸਕਿਆ ਹਾਂ।